McDONALD’S

Բիզնեսն առաջ է գնում, ամեն ինչ լավ է, ամեն ինչ հաստատուն է ու բարեհաջող, բայց գալիս է մի պահ, որ ինչ-որ բան պետք է փոխել` թեկուզ ամեն ինչ թվում է հենց այնպես է, ինչպես որ պետք է լիներ: Փոխել, որովհետև աշխարհում ամեն ինչ փոփոխվելու կարիք ունի… Իսկ ինչպե՞ս անել, որ փոփոխությունդ ոչ թե կորուստ լինի, այլ  բարեփոխում: Բանաձևը` երևակայություն, աշխատանք ու ՌԻՍԿ… Մի՛ վախեցեք ռիսկի դիմել… Ահա ռիսկի, հաջողության ու մի բրենդի պատմություն:

200.000 դոլար տարեկան եկամուտից McDonalds եղբայրները բոլորովին դժգոհ չէին, այդպիսի եկամուտ էր բերում նրանց փոքրիկ ռեստորանը Կալիֆորնիայում:
Հավանեցի՞ր, դե տեղեկացրու ընկերներիդ` 

Նմանատիպ ռեստորաններ շատ կային տարածքում,  և պետք էր, որ McDonald’s-ն ինչ-որ կերպ տարբերվի: Եղբայրները որոշեցին փոխել ռեստորանի ոճը, բայց արդյունքում բոլորովին նոր հայտնագործություն արեցին` ֆասթֆուդային սպասարկում: Ռիչարդ և Մորիս Մաքդոնալդսները ավանդական ճաշացանկից հանեցին այն ամենը, ինչ պետք էր ուտել դանակ-պատառաքաղով, հախճապակե սպասքը փոխարինեցին թղթից պատրաստված ամանեղենով։ McDonald’s-ում այլևս չկար ոչ մի մենյու և ոչ մի մատուցող. ամանները պետք չէր լվանալ: Ազատ սեղան էլ պետք էր փնտրել ինքնուրույն: Այս ամենի շնորհիվ McDonald’s-ի համբուրգերները կրկնակի էժանացան, իսկ դրանց համար հերթերը կրկնակի երկարեցին: Արդեն սովորական էր փոքրիկ ռեստորանի մուտքի առաջ տեսնել  հերթ կանգնած 150մարդ: Այսպիսով, Մաքդոնալդս եղբայրներին հաջողվեց միավորել 3 կարևոր բան՝ էժանություն, արագություն և քաղցի արագ հագեցում: Շատ շուտով պարզ դարձավ, որ ռեստորանի նոր ձևը գտել է իր շուկան: Պահանջարկը մեծացավ, եկամուտն էլ դրա հետ միասին: Տարեկան McDonalds-ն արդեն ապահովեց 350.000 դոլար:

Եղբայրներին սա հրաշալի տարբերակ թվաց, բիզնեսն ընդլայնելու ցանկություն նրանք չունեին, խաղաղ կյանքը նրանց սրտով էր: Սակայն մի օր աշխատանքային այցով Մաքդոնալդսում եղավ գործարար Ռեյ Կրոկը: Տեսնելով արագ սնունդի հետևից շտապող մարդկանց, Կրոկը հասկացավ, թե այս բիզնեսն ինչպես կարող է գործել ամբողջ աշխարհում: Եղբայրները սիրով նրան վստահեցին այդ գործը: Կրոկի նախաձեռնությամբ բացվեցին նոր Մաքդոնալդսներ, որոնք առաջարկում էին 10 տեսակի ուտելիք` համբուրգեր, չիզբուրգեր, ոչ ալկոհոլային 3 ըմպելիք, կաթ, սուրճ, չիպս, կարտոֆիլ ֆրի և կարկանդակներ: Շատ շուտով 1961թ. Ռեյ Կրոկը եղբայրներից գնեց McDonald’s-ը: Դա այնքան էլ հեշտ չէր, 2.7 միլիոն դոլար Կրոկը չուներ և փորձում էր վարկատու գտնել: Իսկ եղբայրներին իրենց հայտնագործության համար այս գինը շատ հարմար թվաց: Ֆասթֆուդի բիզնեսի համար ռիսկի գնացին և’ Կրոկը, և’ վարկատուն: Ռիսկը ավելի քան արդարացված էր: 1965թ. ԱՄՆ-ում գործում էր արդեն 700 Մաքդոնալդս: Այդ տարի վաճառվեց միլիարդերորդ համբուրգերը: Բայց Կրոկը շարունակում էր պնդել, որ ինքը զբաղվում է ոչ թե համբուրգերների, այլ անշարժ գույքի բիզնեսով: Այսօր McDonald’s բրենդի ներքո գործում է ավելի քան 30.000 ռեստորան 118 երկրներում:  Հետազոտությունները ցուց են տալիս, որ 8 ժամը մեկ աշխարհում բացվում է նոր McDonald’s: McDonald’s անշարժ գույքի ամենամեծ սեփականատերն է և նրա սեփականության մակերեսն ավելի մեծ է , քան կաթոլիկ եկեղեցու անշարժ գույքի մակերեսը: McDonald’s-ները գտնվում են բոլոր քաղաքների ամենաբանուկ փողոցների վրա, ամենակենտրոնական խաչերուկներում:
McDonald’s չի դադարում ռեկորդներ սահմանել. 1990 թ. մոսկովյան առաջին McDonald’s-ից օգտվելու համար 30.000 մարդ  հերթ կանգնեց: Այդպիսի քանակով հաճախորդների ոչ մի ռեստորան մինչ այդ չէր սպասարկել:

Իսկ հիմա մի քանի McDonald’sյան փաստեր.

1970-ական թվականներին ամերիկացիները այդ ուտելիքի վրա տարեկան 6 միլիարդ դոլար էին ծախսում, 2001թ.-ի տվյալներով` ավելի քան 110 միլիարդ: Դա ավելի շատ է, քան բարձրագույն կրթության, համակարգիչների, մեքենաների վրա ծախսվող գումարը: Ավելի շատ, քան գրքերի, ամսագրերի, ֆիլմերի, թերթերի , տեսա- և ձայնասկավառակների վրա ծախսվող գումարը միասին վերցրած:

Միջին ամերիկացին ուտում է 3 համբուրգեր և 4 բաժին կարտոֆիլ ֆրի ամեն շաբաթ:

Ամեն 8-րդ աշխատողն ԱՄՆ-ում ինչ-որ ժամանակ աշխատել է McDonald’s-ում:

McDonald’s-ի աշխատողների 2/3-ը փոքր է 20 տարեկանից: Նրանք աշխատում են շատ ցածր աշխատավարձով:

1958թ. լույս տեսավ առաջին ցուցումների ժողովածուն, որ բաղկացած էր 75 էջից և մանրամասնորեն նկարագրում էր ուտելիքի պատրաստման և հաճախորդների հետ շփման կանոնները: Այսօր այդ գիրքն ունի 750 էջ և այն անվանում են McDonald’s-ի աստվածաշունչ:

1948-1968թթ. McDonald’s-ում աշխատում էին միայն տղամարդիկ: 1968թ. թույլատրվեց աշխատել նաև կանանց, բայց կադրերի բաժինն ընտրում էր ամենաանհրապուրիչ և փոքր կրծքերով կանանց:

McDonald’s բրենդով ռետսորան բացելու համար դուք այսօր պետք է վճարեք 1 միլիոն դոլար: Կազմակերպության աշխատակիցներն ասում են, որ այդ գումարը չափազանց արագ ետ կգա ձեր գրպանը:

Ասում էին, թե McDonald’s-ը մտադիր է գրավել նաև հայկական շուկան: Ընկերության մենեջերները մտադիր էին երևանյան բուհերի ուսանողներին առաջարկել հատուկ նախապատրաստություն անցնել Անգլիայում, ինչից հետո նրանք կկարողանային աշխատել McDonald’s-ի ցանցում: Անգամ աշխատավարձի չափն էր նախօրոք որոշված՝ ամսական մինչև $ 1700:

Թե ուր կորավ այս մտադրությունը, պարզ չէ, բայց այսօր էլ բոլոր երեխաները, հատկապես շրջաններից ու գյուղերից, երազում են գոնե մի անգամ լինել McDonald’s-ում: Բայց հավատացեք, McDonald’s-ում արտասովոր ոչ մի ուտելիք չկա, այն կարող են պատրաստել աշխարհի բոլոր մայրիկները: Իսկ որ այն վնասակար է առողջությանը, վաղուց է հայտնի, բայց դա արդեն բոլորովին ուրիշ պատմություն է:
Հավանեցի՞ր, դե տեղեկացրու ընկերներիդ`

Posted in: Բրենդներ